English
မြန်မာ
မြန်မာ (unicode)
မညီမျှမှုများ ပိုမိုဆိုးရွားလာနေဟု Doing Good Index (DGI) ၂၀၂၂ ခုနှစ်အစီရင်ခံစာကဖော်ပြနေ
အာရှ နိုင်ငံပေါင်း ၁၈ နိုင်ငံရှိ လှူဒါန်းမှုများနှင့် ပုဂ္ဂလိကကဏ္ဍ လူမှုရေးရင်းနှီးမြှုပ်နှံမှုများအတွက် ဖြစ်နိုင်ခြေ ပတ်ဝန်းကျင်အပေါ်တွင် လေ့လာသည့် ၂၀၂၂ ခုနှစ် Doing Good Index အစီရင်ခံစာကို Centre for Asian Philanthropy and Society (CAPS)မှ ဇွန်လတွင် ထုတ်ပြန်ခဲ့သည်။
မြန်မာနိုင်ငံအနေဖြင့် ၂၀၂၀ ပြည့်နှစ် အစီရင်ခံစာတွင် “လုံလောက်စွာ ဆောင်ရွက်ခြင်းမရှိ - Not Doing Enough”မှ “ဆောင်ရွက်မှုအဆင်ပြေလာသည် - Doing OK” သို့ အဆင့်တက်လှမ်းနိုင်ခဲ့သော်လည်း လက်ရှိနိုင်ငံရေးအခြေအနေများကြောင့် ၂၀၂၂ ခုနှစ်အစီရင်ခံစာ အတွက် စစ်တမ်းကောက်ယူနိုင်ခဲ့ခြင်းမရှိပေ။ ယင်းအစား MCRB နှင့် Yever တို့မှ ကျွမ်းကျင်ပညာရှင် နှင့် လူမှုရေးဆိုင်ရာကိစ္စရပ်များလုပ်ကိုင်ဆောင်ရွက်နေသော အဖွဲ့(SDOs) ၂၀ ကျော်နှင့် ချိတ်ဆက်ကာ ကိုဗစ်နှင့် နိုင်ငံရေးအခြေအနေများကြောင့် မြန်မာ့လူမှုရေးကဏ္ဍအပေါ် သက်ရောက်မှုများနှင့်စပ်လျဉ်း၍ ၎င်းတို့၏ အတွေးအမြင်များကို ရယူခဲ့ပြီးဖြစ်သည်။
ကျွမ်းကျင်သူများ၏ အဆိုအရ မြန်မာနိုင်ငံရှိ လူမှုရေး ကဏ္ဍ အခြေအနေသည် သိသိသာသာ ပျက်ယွင်းလာကြောင်းနှင့် လက်ရှိတွင်မရေမရာမှုများနှင့်အတူ ကြိုတင်စီမံကိန်းချဆောင်ရွက်၍ မရလောက်အောင် အခက်အခဲများ ကြုံတွေ့နေရကြောင်း လူမှုရေးဆိုင်ရာ လုပ်ကိုင်ဆောင်ရွက်နေကြသော အဖွဲ့ (SDOs)များအားလုံးက မီးမောင်းထိုးဖြေကြားသည်။ အစီရင်ခံစာတွင် ကိုဗစ်-၁၉ ကပ်ရောဂါကြောင့် ယေဘုယျအားဖြင့် ကမ္ဘာနှင့်အဝန်း ဆင်းရဲမှုနှုန်း အမြင့်တက်ဆုံးကာလဖြစ်ခဲ့ပြီး အာရှတလွားရှိ လူမှုရေးကဏ္ဍတွင် ရန်ပုံငွေထောက်ပံ့မှုများလည်း လျော့နည်းခဲ့ကြောင်း၊ ဒေသ၏ လူမှုရေးကဏ္ဍဖွံ့ဖြိုးတိုးတက်မှုအတွက် အတားအဆီးဖြစ်နေသော အခြေခံဖွဲ့စည်းတည်ဆောက်ပုံ အခြေအနေများရှိနေကြောင်း ရေးသားထားသည်။
ပါဝင်သင့်ပါဝင်ထိုက်သူများအားလုံးပါဝင်၍ အရှည်သဖြင့်တည်တံ့ခိုင်မြဲသော ဖွံ့ဖြိုးမှုတစ်ရပ်ပေါ်ပေါက်လာရန် အာရှနိုင်ငံအသီးသီး၏ စီးပွားရေးကဏ္ဍများတွင် ရှင်းရှင်းလင်းလင်းနှင့် နည်းစနစ်တကျခိုင်မာစွာရှိသော မူဝါဒများ ဖော်ဆောင်ရန် လိုအပ်ကြောင်း အစီရင်ခံစာက ဖော်ပြထားသည်။ မြန်မာနိုင်ငံတွင် လူမှုရေးနယ်ပယ်ကို ခိုင်မာအားကောင်းအောင် ဆောင်ရွက်ရာတွင် လူမှုရေးဆိုင်ရာ လုပ်ကိုင်ဆောင်ရွက်နေကြသော အဖွဲ့ (SDOs)များနှင့် ၎င်းတို့ကိုပံ့ပိုးသူများ အနေဖြင့် ကြုံတွေ့ရမည့် ထပ်တိုးစိန်ခေါ်မှုတစ်ခုမှာ ပါဝင်ပတ်သက်နေသူအဖွဲ့များအကြား ယုံကြည်မှုကို ပြန်လည်တည်ဆောက်ရန်ဖြစ်သည်။ ကြီးမားသည့်စိန်ခေါ်မှုတစ်ရပ်ဖြစ်သော်ငြားလည်း ဖွံ့ဖြိုးရေးအဖွဲ့အစည်းများနှင့် ရန်ပုံငွေဆိုင်းငံ့လိုက်သည့် အလှူရှင်အဖွဲ့အစည်းများထွက်ခွာသွားပြီးနောက် ကျန်ရစ်ခဲ့သောကွက်လပ်မှာ လူမှုရေးဆိုင်ရာ လုပ်ကိုင်ဆောင်ရွက်နေကြသော အဖွဲ့ (SDOs)များနှင့် ပုဂ္ဂလိက ကဏ္ဍတို့အကြားပူးပေါင်းဆောင်ရွက်ခြင်းဖြင့် ဖြည့်စွမ်းနိုင်မည့် လမ်းစတစ်ရပ်ဖြစ်ကြောင်း အစီရင်ခံစာကဆိုသည်။
DGI ၂၀၂၂ အစီရင်ခံစာနှင့်ပတ်သက်၍ သိရှိလိုပါက CAPS မှလွှင့်တင်ထားသော ဤဝက်ဘ်ဆိုက်တွင် ဝင်ရောက်ကာ DGI ၂၀၂၂ အစီရင်ခံစာ နှင့်ပတ်သက်သည့် အချက်အလက်များကို ရှာဖွေလေ့လာနိုင်ပါသည်။ အချက်အလက် အကျဉ်း စာမျက်နှာ တွင် ဝင်ရောက်ဖတ်ရှုသူများ ကိုယ်တိုင်ကိုယ်ကျ အသေးစိတ် ထဲထဲဝင်ဝင် လေ့လာ ဆန်းစစ် သုံးသပ် နိုင်ရန် နိုင်ငံအသီးသီး၏ နှစ်အလိုက် ပြောင်းလဲမှုများနှင့် စီးပွားရေးဆိုင်ရာအချက်အလက်များကို လည်း ဝေဝေဆာဆာဖော်ပြပေးထားပါသည်။
